O mellor lugar para ver as pallozas nos Ancares

Situada a uns 1300 metros de altitude, aos pés dos cumios da Serra de Ancares, Piornedo é unha aldea onde parece que non pasou o tempo.

Na aldea de Piornedo, aínda hoxe se poden ver as típicas pallozas, vivendas con teito de palla habitadas ate hai ben pouco tempo por persoas e gando.

Algunha de estas pallozas pódese visitar, algo que sen dúbida recomendo facer. A que visitamos nós a última vez que estivemos en Piornedo só custa 1 euro por persoa.

Piornedo é tamén un bo lugar para gozar da montaña, xa que desde aquí se pode facer algunha ruta de sendeirismo coma a coñecida ascensión ao Pico Mustallar (11.4 km ida e volta nunhas 5 horas e 832 metros de desnivel positivo).

Tamén é un bo lugar para os que nos gusta a bici. Se levamos unha bici de estrada, recomendo subir desde Piornedo ate Porto Ancares, que foi final de etapa na Vuelta no ano 2012. Nós subimos ese porto nese mesmo ano nas nosas bicis de montaña.

E se preferimos a bici de montaña, nestes montes tamén hai boas rutas.

Tamén é un bo lugar para ir con nenos, xa que hai moitos animais e contacto coa natureza,

Aínda que Piornedo é unha aldea ben fermosa, pódese ver tamén algún feismo. Agardamos que co tempo se vaian solucionando.

Estes feismos son, afortunadamente, moi escasos aquí, así que Piornedo segue a ser un dos imprescindibles da Nosa Terra.

Polo tanto, paga a pena vir ate aquí, aínda que teñamos que pasar case unha hora por unha estreita estrada chea de curvas.

Ademais, tamén recomendo visitar lugares preto de aquí coma o antigo glaciar de Os Tres Bispos, o Castelo de Doiras, a localidade de Navia de Suarna ou a aldea de Balouta.